الخميس، 7 أكتوبر 2010

اللي يضربك اضربيه

image 

طفلة بتقول لمامتها الصبيان بيضربوني ياماما

الام قالت لها اللي يضربك اضربيه بس مش تضربي اي حد اللي يضربك بس

 

البنت لقتها بتضحك ضحكه ان معناها انها قادرة ترد الضرب  وهتنفذ فعلا

الموقف دا خلاني ابص للموضوع من كذا زاوية

لو حبيبه ( ربنا يرزقني بيها يارب )  بتقولي ياماما فلان بيضربني

هيكون تصرفي ايه

لقيت ان هقولها لما يضربك روحي للمس وقولي ليها الكلام دا

وهي هتتصرف

لو حصل الموقف تاني والمس كانت سلبيه او كبرت دماغها

هكلم المس بنفسي

لو حصل تالت

هكلم المديرة

لو حصل رابع

هكلم اهل الولد

لو حصل اخيرا هصدر ابو حبيبه بئا

لكن اني اقول لبنتي اضربيه

كدا هتكون عدوانيه اوي عمر ما ماما قالتلي اضربي اللي يضربك

بس فكرت تاني

انا دلوقت باخد الضربه ومش بردها وبقعد اكبت في نفسي واعيييييييييط

واصلي وادعي ربنا ان انا مظلومه واني مسامحه بس يظهرلي انا كنت صح ولا غلط

يبقي استنتج من هنا ايه

ان البنت تضرب وتكون وسيلتها لاي حاجه عدوانيه وهي لسه في ابتدائي

ولا تكون حليمة في تصرفتها ؟؟

 

هناك 11 تعليقًا:

غير معرف يقول...

مش لازم اللي يضربها تضربه بس اللي ضربها لازم يتعاقب وفي ساعتها والميس هي اللي تعاقبه لو ما حصلش؟ يبقي الام تتدخل لو ما حصلش ؟ يبقي الاب يتصرف ولازم يصمم انه ياخد حق بنته حتي لو لجأ لوزير التربية والتعلبم

مش لازم يتعاقب بالضرب يكفي بالاعتزار للبنت عشان غلط في حقها او يتذنب مثلا

لكن بصراحة صعب اوي علي نفسية طفل انه يستحمل ظلم خمس مرات من غير ما يحس بكرامته وياخد حقه بالطريقه اللي اتربي عليها مش بالضرب لكن بالادب
وده اللي هيميزها عن زميلها اللي ضربها

ده رأي
بجد الموضوع والفكرة روووووعة ومهم جداااا
دمتي مبدعة يا كيتي
وكل سنة وانتي طيبة

غير معرف يقول...

وساعتها ممكن نغير المعادلة من
اللي يضربك اضربيه
إلي
اللي يضربك عاقبيه بالادب

انا عارف اني طولت في التعليق
بس الموضوع مهم لابعد درجة المواقف الصغيرة اللي بيتعرضلها الطفل من وجهة نظرنا بتكبر وتتضخم معاه وتربي جواه عقد و سلبيات نتفاجئ بيها بعدين

عشان كده ياريت كل الناس زيك وبيهتموا بمواضيع تهم مستقبل اولادنا اللي جم او اللي لسه هييجوا
ويفتحوا طرق للنقاش زيك

بارك الله فيكي

ادم المصرى يقول...

بوست جميل

Tamer Moghazy يقول...

كلمة حلوة عجبتني:
(لا تجعل سفالة الاخرين..مبرر لاظهار سفالتك) (';' )

صعب قوي نتخيل اننا بنربي اطفالنا على اللي بنكرهه في الاخرين..!!
لذلك الموضوع عاوز كياسة في اقناع الطفل بان فيه وسائل كتير ممكن بيها ناخد حقنا من غير ما نغير مبادئنا.
وفي نفس الوقت مش نتكاسل عن متابعة حق الطفل لان ده بيسيب عقدة كبيييييرة قوي جواه مش ها نعرف مداها.

تربية الطفل اعقد واكبر حاجة ممكن تواجهنا.

KEBLAWYAT يقول...

ياااه

فكرتونى بميس سوسن

اما اشتكيتلها معبرتنيش

واما اخدت حقى بنفسى .. كانت النتيجة اول لقاء ليا بالمديره ،، وأول " متجيش بكره غير ومعاك ولى امرك "

Kiara يقول...

اشرف ... جدوووووووو

اولا لازم فعلا يتعاقب لكن بطريقه صح عشان البنوته مش تتعقد

مهو خمس مرات بي خلالهم في دعم من الام هيكون جامد مش هقول قولي للمس وبعدين انسي لازم ادعم دا

Kiara يقول...

جدوووو .. كلاكيت تانى مره

طول براحتك ياجدووو

عارف انا الموضوع دا شاغل تفكيري جدا وبركز اوي في تصرفات ماما وتصرفات الامهات التانيه عشان لما ربنا يكرمنى واتجوز وحبيبة تيجي باذن الله اكون فعلا اد كلمة ماما

غير القراية مهمه جدا كمان

يارب الجيل الجاي يكون واعي ومدرك يااشرف يااااااااارب

Kiara يقول...

ادم

الاجمل مرورك:)

Kiara يقول...

تيمووو

حلوه الكلمه دي اووووووووي

كل اما اتخيل انى مسئوله عن كائن صغير وانه هيتشكل حسب تفكيري وتوجهاتي بخاف واحس انها مسئولية تفوق الوصف

زي ماقلت لاشرف لازم هيكون في من الام دعم مش اسهل عبارة اللي يضربك اضربيه وكررتها كتييييييير وكانت بتضحك وهي بتقولها لبنوتتها

Kiara يقول...

قبلاوي

شئ وارد ان الميس مش تعبرك لان اغلب الميسات مش قد التربية دول بصمجية

عاوزين تاهيل الاول قبل اما يعلمو زمان الامهات كانو بيسيبو الاطفال مع الميسات وكانو مطمنين دلوقت اناا اخاااااااف

طب والله انا فاكره ميس سهير وميس ناهد لما كنت في ابتدائي

كنت بحس انهم ماما في المدرسة وكانت ماما بتوصيهم علي اكلي وكل حاجه ولما بطلع رحله بيحافظو عليا وبيدونى الدوا في معاده في ميس كدا دلوقت ... اشك

L.G. يقول...

تصدقي الموضوع ده شغلني جدا في فترة
كانت اختي وجوزها يقولوا لإبنهم اللي يضربك اضربه وكان شاغلني افرضي اللي ضربه ااقوى منه بكتير وحاول يضربه حيعجنه
ولما قلتله لما كبر شوية قول للمدرس قالي مبيعملش حاجة يا خالتو
دلوقتي بقوله قدر الموقف لو تقدر اضربه لو هو ااقوى منك
هههه فلا تناهض من هو اقوى منك
بس ده يستلزم انه يقدر الموقف اساسا بس مكدبش عليك لو مضربش حيتعجن حتى لما يكبر اذن ... اللي يضربك اعجنه :))))
تحياتي