السبت، 3 يناير 2009

يوم السبت



في البدايه بعتذر للي كلمني ميل النهارده ولاقاني حزينه اكيد غصب عني

اليوم النهارده كان مش عارفه ماله برغم اني كنت صاحيه نوعا ما عندي قوه نفسيه

صحيت الصبح مش لاقيت محمد نسيت انه في الشغل ياقلبي

طبعا نمت في اوضتي بعد اما ماما طردتني امبارح من الاوضه عشان السقعيه بتاعت جسمي كنت ببردها

عندها حق هي بليل جت تقولي تعالي نامي جنبي قولتلها لا ده انتي طردتيني شر طرده الضهر

كنت نايمه مبسوطه بعد اما قريت البوست اللي نزلته سميلي ليا اد ايه هي رقيقه والله مابقيت عارفه اصحابي بيحبوني علي ايه

المهم ركبت المترو وماما نزلت معايا وكنت قاعده مشغله ملاك حارس


انا عايزك ملاك حارس

بيحرسني من الايام

حنين قلبي وانا معاكي يدفيكي باحلي غرام

بحبك كل يوم اكتر

معاكي الحلم يتفسر

ويفضل حبنا احلي واجمل حتي من الايام

انا عايزك

انا عايزك غنا صوتي

كلامي وهمسي وسكوتي

يانسمه رقيقه بتفوتي اغنيلك عنيكي تنام

انا عايزك


انا عايزك هنا جنبي

بحبك اسكني قلبي

ولا تخافي ولا تحاسبي ولا يهمك ياروحي كلام

انا عايز ملاك حارس

حسيت وانا بسمعها اني رجعت لايام الجامعه

حسيت اني رجعت لاحلامي الورديه

وانا بسمعها عنيا بتغمض وبحلم

وكنت كل ده في المترو فماما لاقتها بتناديني في واحده كبيره واقفه المهم قمت عشان هي تقعد

ومن غير ما كانت ماما تقولي انا لما بشوف حد كبير بقعده

وفعلا بستغرب علي الامهات اللي بتقعد اطفال 3 سنين وبتسيب ستات مسنه واقفه

الرحمه ليها ناسها برده


رحت مضيت ورحت الشغل بدانا 2009 والنظام اتغير فقعدت اهمل شغل الجهاز التاني مؤقتا

بعدها روحت بس وانا مروحه رحت عديت الطريق ووقفت علي النيل شويه

كان واحشني حسيت انه بيكلمني وبيقولي مالك

مش انتي اللي بتكلميني دايما فيكي حاجه ياوردتي

كلمته عن اصحابي واد ايه هما بيعانو واد ايه انا بتالم لده

بعدها سيبته ومشيت روحت البيت واخدت بالي من المعديه اهوووووو

وانا في المترو

كان في طفل برده لاعبته وكان زي العثل



وكان عاجبه الموبايل فشغلتله الفار السندق وقعد يرقص ويتنطنط

بعدها نزلت محطتي ولحد كدا كنت مبسوطه

بعدها قابلت البنت اللي طلبت مني الصور اللي قولت عليها قبل كدا

وعيطت اوي لدرجه اني روحت علي تيتا وبكيت في حضنها اوي وسالتها اعمل ايه

قالتلي هي غلط انتي مش تغلطي انتي كمان وتعملي حاجه مش راضيه عليها

مهما كنتي بتحبي تساعدي حد مش يبقي علي حسابك انتي

روحت وسجدت لربنا انه يلهمني الصواب

بعدها فتحت الميل قلت يمكن اكلم حد واقدر اخرج اللي جوايا لكن مقدرش قلت انام

وانا نايمه حلمت ان حد بيترجاني وبيطلب مني اتبرعله بالدم وبرغم اني بخاف من الحقن

قلت له حاضر ياحج

وهي بتشكني اول شكه اتنطط من الوجع قلت معلش استحمل


والحلم كان فيه بالتصوير البطي المؤلم جدااااااا ازاي اتبرعت بالدم

بعدها صحيت من النوم كنت مقريفه جدا

فتحت الميل كلمت زوزو كانت وحشاني والله

ولاقيت اخويا جه من الشغل وقمت

وكلمتني روزليندا

المهم كلمتني لحد اما رصيدها خلص

وبعدها كلمتها لحد اما رصيدي خلص

يعني قعدنا بتاع ساعه ونص علي التليفون

منكرش اني كنت فرحانه اني بكلمها بس كنت حزينه علي اللي حصلها من محمود من تاني بس هي جدعه

بهدلت بكرامته الارض وقالتله مش يتصل بيها تاني

ال كان نفسه تبقي هي اول واحده تقوله كل سنه وهو طيب ال


وكلمتني علي رساله احمد ليا وليها لما قالنا اننا اصحاب واخوات سكه ومش هيقول ليا يازباله انتي وهي يقصدني انا :(

بعدها فتحت الريدر بس بالاكسبلورر

وبدات ارد علي الناس

كان عندي 122 بوست في الريدر

ربنا يقدرني

واهو فاضل ربع ساعه والديييك بيدن كوكوكوكوكوووووووووووووووووو


يوم السبت

3.1.2009















هناك 8 تعليقات:

فتاه حالمه يقول...

هيييييييييييييييييه
اول تعليق
سماح يا باشا
بس روق بقي وافردها يا عم
اموااااااااااااااااااااااااة
خلاويص

حسن حنفى يقول...

يبقي انا مش عندي دم زي ما اصحابي بيقولوا اما البس بنص كم

:d

هههههههههههه

فكك

فارس القمر يقول...

كل سنه وانتى بخير
ازيك ياستاذة هقولك ....
عيشى حياتك وعيشى ايامك ومتجعليش للاحزان اماكن فى قلبك
ياعالم امبارح كنا عايشين بكرة هنبقى ايه
ومتزعليش من اى حاجه مش بناخد من الدنيا حاجه
غير الاوجاع

وروقى كدا

ولد مصري يقول...

الحقيقة مش عارف أقولك ايه

لكن عموما:

أولا كويس إنك بقيتي تخلي بالك وانت بتعدي ويا ريت ده يحصل على طول مش يوم ويم

ثانيا بالنسبة لموضوع الصور حتى لو قعدت تعيط إوعي تعملي كده لانك كده اكنك بتشهدي شهادة زور لو صاحبها اترجاكي وقعد يعيط هتروحي تشهدي؟ اكيد لأ الموضوع ماينفعش فيه صداقة ده يودي حهنم فانا بارجوكي انك ماتسمعيش كلامها

ثالثا واخيرا موضوع السهر للفجر ده وتاني يوم عندك شغل اكيد هيأثر عليكي ربنا عمل الليل علشان الناس تستريح فيه ومش عاوز ادخل معاكي في دورة الكورتيزون في الجسم لكن الخلاصة ان الموضوع ده بيأثر على ضربات القلب والضغط ومعدل السكر فمن الآخر نامي بدري :)

خالص تحياتي وأمنياتي ليكي إن ربنا يشرح صدرك

فشكووول يقول...

العزيزه كيارا:
مش انا عندى حق لما كنت عايز اخطب قطر الندى .. اصلها حلوه وبنت ناس وكمان ابوها كان غنى وحيشيل عنى مصاريف الفرح ..
تحياتى

حروف يقول...

بوست جميل وربنا ييسرللك الحال يارب ويارب الحزنيبعدعنك وتكون حياتك فرح ديايما

princess يقول...

تانى مرة اتفق مع ولد مصرى كده هبتدى اقلق هههههه
لا بجد فكرى انك تعيشى اليوم بيومه يا بنتى
واللى ضميرك يقولك عليه اعمليه
بس
كده:)
سلاموز

moory-mero يقول...

السلام عليكم ورحمة الله وبركاته

ياه كل ده حثل وموث حكتيلي

نثيتي تقولي انك موث كلمتيني نت وث بيطلع لثانه ههههههههه

ياكيتي يا حبيتبي خليكي جدعه دايما واعملي اللي قلبك وعقلك متفقين فيه عثان تكوني مرتاحه نفسيا

وبحدين اياكي تقولي زحلانه دي تاني محقوله دي تزحلي وانا محاكي بث خفي من اللي بقولك حليه والا هطير منك ههههههههه

يلا هاتيلي مثاثه بقى

في رعاية الله