النهارده 1/12 يعنى شهر من الان ونبدا سنه جديدة , 2012
كانت خطوات كارثية بالنسبة ليا و2013 نهاية الخطوات وبداية اهداف جديدة
بفكر فيها تختلف عن زمان .. عشان انا مبقتش زى زمان ,, ساعات بخاف باللي
جاي وساعات بقول انا مستعدة للي جاى ... بس مبسوطة انى بقيت مختلفه داخليا
عن الاول . يمكن مش متعوده علي كدا بس زى ما اتعودت علي اللي قبل كدا هتعود
علي كدا ... يارب اللي جاي يكون احسن ليا وللجميع ويبدل الحزن فرح للجميع
ويحقق احلام الكل ويغير سلبياتنا المسيطرة علينا داخلينا لايجابيات ونعرف
ازاي نحقق الفرحة ونمسكها بايدينا مش نحط ايدنا علي خدنا ونستناها تيجى
اتعلمت ان الحياه تتاخد كدهون علي رايي ممثلة مش فاكراها
الأحد، 1 ديسمبر 2013
الثلاثاء، 25 يونيو 2013
مجرد تجربة
بسم الله الرحمن الرحيم
اوقات بنمر بتجارب بتعملنا وتجارب بتقوينا
لكن .. التجارب اللي تدمر كل حاجة حلوه جوانا
بتكون مرة اوى
ومرارتها محدش بيدوقها غير اللي بيمر بيها
اللي حواليك نفسهم يساعدوك لكن هيساعدوك ازاي والقدر بيحكم ان المرارة دى اللي بيحسها شخص واحد بس وهى انت
ربنا يعدى المرارة دى علي خير
وتكون حاجة تشفعلي قدام ربنا
الحمد لله
الأربعاء، 13 يوليو 2011
كُنا زماااااااان
كُنا زمان اقوووووى
كُنا في جراح اقووووووى
وعذابنا كان بيمر …..
ايوا زمانا اتغير
دلوقتي جرح صغير
يجرحنا طول العمر …….
كُنا زمان اقوووووى
كُنا في جراح اقووووووى
وعذابنا كان بيمر …..
ايوا زمانا اتغير
دلوقتي جرح صغير
يجرحنا طول العمر …….
^^^^^^^^^^
كان دمعنا جوانا غالي
مكنش صوته حزين وعالي
بقي دمعنا .. طول الليالي .. دمع كله اهات ومر
كان دمعنا جوانا غالي
مكنش صوته حزين وعالي
بقي دمعنا .. طول الليالي .. دمع كله اهات ومر
كُنا في جراح اقووووووى
وعذابنا كان بيمر …..
ايوا زمانا اتغير
دلوقتي جرح صغير
يجرحنا طول العمر …….
كُنا زمان اقوووووى
كُنا في جراح اقووووووى
وعذابنا كان بيمر …..
ايوا زمانا اتغير
دلوقتي جرح صغير
يجرحنا طول العمر …….
^^^^^^^^^^
آآآآآآآآآآآآآآآآآآآه ه ه ه آآآآآآآآآآآآآآآآآآ ه ه ه
إحسسانا زمان كان يتحمل
مهما الحياه تقسي علينا
بنعشها بردو بنكمل
ولا دمعه بتبان في عنينا
إحسسانا زمان كان يتحمل
مهما الحياه تقسي علينا
بنعشها بردو بنكمل
ولا دمعه بتبان في عنينا
كان دمعنا جوانا غالي
مكنش صوته حزين وعالي
بقي دمعنا .. طول الليالي .. دمع كله اهات ومر
آآآآآآآآآآآآآآآآآآآه ه ه ه آآآآآآآآآآآآآآآآآآ ه ه ه
^^^^^^^^^
لطيفة … كُنا زمان
الجمعة، 8 يوليو 2011
الأحد، 31 أكتوبر 2010
في ناس
هناك أشخاص عندما تلتقى بهم تشعر وكأنك التقيت بنفسك
غادة السمان
في ناس فعلا انا بحس معاهم الاحساس دا
وعشان مش عاوزه اخسرهم
مش هقول اسمائهم بس اكيد هما عارفين غلاوتهم عندي
فمش هقدر اقول غير
بحبكم اووووي
الجمعة، 29 أكتوبر 2010
حواء هى حواء
النهارده حصل موقف عجيب اوي
ماما الصبح واحنا بنروق لقتها جيالي وبتقولي بصي الورقة دي
ودي مش عادتها لما بتشوف ورقة بتركنها ولما بنخلص بنتكلم
لقتها بتقولي بصي الورقة دي شوفى محمد كاتب ايه
" عاتبني لو لحظه نسيتك
خاصمني لو بكلامى اذيتك
بس متلومنيش من كتر ماحبيتك .. وهكذا الخ الخ "
طبعا انا مش ركزت ان الموضوع رسايل
انا قلتلها دا مش محمد ياماما دا خط بابا
لقيتها بصتلي بصه وعنيها برقتلي
باباكى مين
ايه ياماما هو انا عندي ميت اب ولا ايه
قالتلي ودا كاتبه لمين
انا قلت الموضوع هيقلب ياريتنى كنت لبستها في محمد وخلاص
ركزت قلتلها ايه ياماما بابا ساب كتابة الشعر من ساعة اما اتجوزتو هههههههه
زي مااكون كنت بهدى النفوس بس
قالتلي يعني ايه
قلتلها دي رسايل تقريبا ناقلها عشان يبعتها علي الموبايل عادي يعني
وبعدين انتى هتغيري بعد 26 سنة جواز
برقتلي
فسبتها وبعدت عنها خالص لا اتحدف باي حاجه
بس كنت سامعه بئا خبط ورزع بس عااااااااااادي عملت نفسي عبيطة وطنشت خاااااااااالص
وبلاش احكي بئا علي اللي حصل لما بابا جه
انا كنت سامعه كلمتين منه بس
في ايه بس حصل ايه
كان طيب والله
يلا عشان يبئا يبعت SMS :)
الخميس، 28 أكتوبر 2010
بحب الدراسات البريطانية
ياسلام علي الدراسات البريطانيه فيها حكمة ونزاهه كدا
ياخلاثي عثل عثل الدراسات البريطانية
بحس انها حاسه بيا كدا وبالعقدة الداخليه اللي فيا
اه والله
يعني لما اقرا الفقرة دي لازم انشكح انشكاح ينكمش بالبروره
ويتمدد بالبرورة بردو باعتبار الشتا علي الابواب
اثبتت الدراسات البريطانية التى أجراها باحثون بريطانيون " طبيعى مش بريطانية " أن المرأة القصيرة تعد أكثر أنوثة من المرأة الطويلة "وقد تفضل جلالته لالالا دي فيلم تاني بس بردو فيه معاناه مع القصيرين عااااااا
بس سيبك شفت الدراسات البريطانية بئا
ياسيدىىىىىىىىىىىى نغم لا وايه كمان حددو الطول من متر ونص لحد 155 وحيث انني اقع في المنتصف منهم
فلازم انشكح العقده اللي عندي انفكت اهي بس الدراسات البريطانية بردو مش قالتلي احل مشكلة اللبس ازاي
مهو اي طقم بجيبه لازم يمر علي عمو الترزي وياخدلي شبرين منه
لو جيبه ليها تطريز من تحت يبقي يقصلي من فوق
وهو يعني الدراسات البريطانية مش قالت للمحلات ولبيوت الازياء العالمية
ان في غلااااااااااااااااااااااااااابة عاوزين يلبسو من غير مايروحو لعمو الترزي
بس في امل بردو :)
الثلاثاء، 19 أكتوبر 2010
يارب قوينى
مش في حاجه بتيجي سهل واتعلمت عشان احس بطعم الفرحه لازم اتعب اوي عشانها
مريت باحلام كتيرة كل حلم او هدف كنت بحس بطعم فرحته اوي لاني كنت بتعبله اوي
بس وجع الحلم دا اصعب من وجع كل الاحلام مجمعه
يارب ادينى القدرة علي الصبر والتحمل وحسسنى بطعم الفرحة اللي بتمناها
يارب حقق حلمى يارب
الأحد، 17 أكتوبر 2010
كل لحظه بتعدى
كل لحظه بتعدى بتاكدلى انى صح في منع الشات :(
انا احسن من امبارح ربنا يخليكو لياااااااااااا
السبت، 16 أكتوبر 2010
الجمعة، 15 أكتوبر 2010
مش قادره امسك نفسي من الضحك
الاول وسيلة المواصلات اللي بركبها هي المترو والدراسة طبعا بدأت
وطبيعي بئا بيركب المترو طلبة بنات وولاد وعلي كل الاعمار
وخدو عندكو بئا قلة ادب متناهية وعدم احترام للكبير وحاجات كتير اوي
ومواقف اكتر من قلة الادب اللي ممكن تتخيلوها ومش تتخيلوها كمان
بس اخر موقف بئا انا مش قادره امسك نفسي من الضحك فيه
طبعا انا من النوع اللي لو في ثرثار بصرخ وبنط علي الكنبة ولا الاكروبات :)
لدرجه ان مره كنت صاحية علي 4 الفجر وداخله المطبخ عشان اشرب اتخايلت بحاجه ماشية بس عملت هوليله وصحتهم ولقوه ثرثار كانو هيموتو منى يلا قدرهم
طبعا برغي بس انا بمهد عشان تتخيلو انا كان شكلي ايه
بما ان عندي برد ومش قادره اتحرك اصلا بس بروح الشغل مجبره عشان بجهز لسيستم جديد للشغل ومش ينفع اغيب خالث بتاتا
فركبت المترو وقعدت وركب بعدي شوية بنات في سن اعدادي كدا وقعدو علي الارض كاجروب وقعدين يرغو بئا المستر عمل المستر سوى دا مش عارف مين وقطعو في فروة كوووووووول المدرسين في كام دقيقة
المهم والمترو بيدخل المحطه وبيفتح الابواب عشان الناس تنزل
نلاقي ايييييييييييييييييييييه
تتوقعو ممكن يحصل ايه ؟؟
ولد في سن 11 سنة كدا مش اكتر رمي حاجه علي البنات والمترو قفل طبعا فجاه لقيت صوييييييت وناس بتنط وناس بتجري وناس طلعت فوق بعضها
وببص لقيت قدامي اييييييييييييييييييييييه فارررررررررررررررر
الواد رمي فارررررررررر
نسيت بئا اني عيانه واني مش قادره اتحرك ولقيت نفسي علي الشباك بتاع المترو من فوق وعماله اصوووووووووت والصوت طالع اصلا مبحوح ونصه فاضي واصرخ وماسكه في الحديدة اللي فوق عشان المترو ماشي والفار مش يخرج لا رايح جاي جري في العربية خايف مننا واحنا كمان خايفين منه وحتي الستات الكبيرة بقت تنط مهرجان فعلا
علي فكرة حصل فعلا و مهما اوصفه مش ممكن تتخيلوا اللي حصل
الأربعاء، 13 أكتوبر 2010
الثلاثاء، 12 أكتوبر 2010
الأحد، 10 أكتوبر 2010
اقر واعترف
انا خايفه اتعرف علي الناس
خايفه اتكلم مع الناس
بسبب اللي حصلي سابقا وحصل لناس قريبه مني
بقيت حتي خايفه اتكلم مع اللي عارفاهم
بقيت معقده وخايفه اخد ضربة تانيه
ضهري يتكسر مش اقوم منها
ماما بتقولي غلط اللي انا فيه
لان الناس فيها وفيها لازم اكون صلبه ومش اي ريح تهزني
بس انا مش صلبة
انا حد ضعيف ممكن بكلامي ابان اني عنيده وقوية
بس جوايا محتاج طبطة وحنيه مش محتاج غدر وترقب للاحداث
بس خلاص انا اتعقدت واللي كان كان
حتي عيد ميلادي مش نزلت بوست خفت حد يجي ويقلب اليوم زي اي لقاء بيتم
خليته خاص بدرجه كبيرة
وانا رايحه كنت بقول لسونى انا خايفه اليوم يبوظ وهي فضلت تطمني ولما انتهي اليوم
قالتلي شوفتي كان يوم جميل شوفتي ازاي انتي كنتي خايفه وقلقانه
قلت الحمد لله
يارب ارجع زي زمان
السبت، 9 أكتوبر 2010
الخميس، 7 أكتوبر 2010
اللي يضربك اضربيه
طفلة بتقول لمامتها الصبيان بيضربوني ياماما
الام قالت لها اللي يضربك اضربيه بس مش تضربي اي حد اللي يضربك بس
البنت لقتها بتضحك ضحكه ان معناها انها قادرة ترد الضرب وهتنفذ فعلا
الموقف دا خلاني ابص للموضوع من كذا زاوية
لو حبيبه ( ربنا يرزقني بيها يارب ) بتقولي ياماما فلان بيضربني
هيكون تصرفي ايه
لقيت ان هقولها لما يضربك روحي للمس وقولي ليها الكلام دا
وهي هتتصرف
لو حصل الموقف تاني والمس كانت سلبيه او كبرت دماغها
هكلم المس بنفسي
لو حصل تالت
هكلم المديرة
لو حصل رابع
هكلم اهل الولد
لو حصل اخيرا هصدر ابو حبيبه بئا
لكن اني اقول لبنتي اضربيه
كدا هتكون عدوانيه اوي عمر ما ماما قالتلي اضربي اللي يضربك
بس فكرت تاني
انا دلوقت باخد الضربه ومش بردها وبقعد اكبت في نفسي واعيييييييييط
واصلي وادعي ربنا ان انا مظلومه واني مسامحه بس يظهرلي انا كنت صح ولا غلط
يبقي استنتج من هنا ايه
ان البنت تضرب وتكون وسيلتها لاي حاجه عدوانيه وهي لسه في ابتدائي
ولا تكون حليمة في تصرفتها ؟؟
الاثنين، 4 أكتوبر 2010
مش عاوزه غيرك انت
مش عاوزه غيرك انت والله بحبك انت .. اهدتها سابقا لمن لا يستحق
فاصبحت هديه بلا قيمة لمن يستحقها حقا
لذلك ساحتفظ باهدائاتى فيما بعد لمن يستحقها
وان طال الزمن فحتما يوجد من يستحقها
لذلك ساتركها بقيمتها الغاليه ولن ابخس بها الارض
فهو يستحق ذلك.
الثلاثاء، 28 سبتمبر 2010
دقات الساعه
وبدأ العد التنازلي علي ان تدق عقارب الساعه دقاتها بصوت هادئ
كى تذكرنى ببدا العام الجديد
لكنى لم اسعد به فلم يسعد بى مثلما مضى في الاعوام السابقة
امنية العام الجديد : يارب اجمعني بنصي الثاني
الأحد، 26 سبتمبر 2010
اخر الدنيا
علشان هي بتحبك هي كانت خايفة تقرب منك ولما قربت خافت من البعد !!
ليه دايما لما بنقابل حد بنحبه بجد وانسان جميل بنخاف ونقول مينفعش
فيلم اخر الدنيا
سؤال : ليه الامهات بيضغطوا علي بناتهم ليه بيتلذذو ان بناتهم ينامو وهما حاسين بالنقص :(
الخميس، 23 سبتمبر 2010
بين الاكتئاب والروقان
ساعات بيجي وقت علي الواحد بيبقي بيمووووووت ونفسه فعلا يموت ويرتاح او يكسر في اي حاجه يعيط زي الاطفال يقول بصوت عالي انا مخنوووووووووووووووق الدنيا ضيقة اوووي ومش لاقي حل لاي مشكله عندى
وساعات تانيه بيكون مبسوووط ومرتاح نفسيا ونفسه يطير ويلعب ويهيص رغم ان اصلا المشكله اللي مخنوقه عشانها فووووق مش اتحلت
ايه الفرق بين الاكتئاب اللي في الساعات الاولي والروقان اللي في الساعات التانيه
الفرق هو الثقه والايمان بالله ان ربنا مش ممكن يكسر بخاطر الواحد وهيحقق حلمه باذن الرحمن وانه هيكتبله الخير
في الحاله الاولي هو للاسف نسى ربه ويقينه ان ربنا قادر علي كل شئ
في الحالة التانية عنده يقين وثقه بالله
وبين دا ودا بتتفاوت حالتنا النفسيه علي قدر ايمانا بالله وثقتنا في انه هيوصلنا لحلمنا
وبس
الاشتراك في:
التعليقات (Atom)